Sit suprema laus Parenti, Qui creavit omnia : Filioque qui redemit Morte nos volens suâ, Par et illi, cujus almo Confovemur Spiritu.
PASTORE percusso, minas Spirabat et cædes lupus: Sparsumque vastabat gregem, Te, Christe, Saulus nesciens.
Et jam catenas stringere Ferox parabat, jam cruces, Sed Oh, repente sternitur, Verboque perculsus ruit.
Ex hoste miles, ex lupo Agnus, gregi se devovet: Et raptor ipse nobili Raptus triumpho ducitur.
Oh celsa cedrorum, Deus, Qui voce vertis culmina, Oh qui potenti subjicis Mentes superbas gratiâ;
Tu, Pastor, infensas tuo Vires ovili contere :
Et nostra, si quid devium, Ad te reflecte pectora.
Uni sit et trino Deo
Suprema laus, summum decus, De nocte qui nos ad suæ Lumen vocavit gloriæ.
SUPREME quales Arbiter Tibi ministros eligis! Tuas opes qui vilibus Vasis amas committere.
Hæc nempe plena lumine Tu vasa frangi præcipis: Lux inde magna rumpitur, Ceu, nube scissâ, fulgura.
Christum sonant: versæ ruunt Arces superbæ Dæmonum: Circùm tubis clangentibus, Sic versa quondam mœnia.
Fac, Christe, cœlestes tubæ Somno graves nos excitent: Accensa de te lumina
Pellant tenebras mentium.
Uni sit et trino Deo
Suprema laus, summum decus, De nocte qui nos ad suæ Lumen vocavit gloriæ.
CELESTIS aulæ principes, Sacri duces exercitûs, Bissena mundi lumina,
Olim futuri judices;
Mersis gravi caligine Per vos dies renascitur: Quos vanus error luserat, Illustrat alma veritas.
Non vi, nec armis militum, Fandi nec ullis artibus,
Verbo sed irrisæ crucis
Christo rebelles subditis.
Vulgata terris omnibus Per vos Dei mysteria: Sic vestra terris omnibus Præclara facta personant.
Uni sit et trino Deo
Suprema laus, summum decus, De nocte qui nos ad suæ Lumen vocavit gloriæ.
QUEM misit in terras Deus, Ut morte nos servet suâ, Amoris hic fidos sui Vos eligit vicarios.
Occisus agnus à lupis Vos misit agnos ad lupos: Mores ferinos exuunt, Agni repente de lupis.
Quæ victimarum cædibus Tellus madebat impiis, Vestris eam sudoribus Vestro piâstis sanguine.
Hôc rore facta pinguior Quot illa fructus protulit! Quæ, quanta surrexit seges! Et ista nos seges sumus. Quam si bonus respexeris, Qui das rigatis crescere, Frumenta nos cœlestibus Matura condes horreis.
Uni sit et trino Deo Suprema laus, summum decus, De nocte qui nos ad suæ Lumen vocavit gloriæ.
PULSUM supernis sedibus, Umbris tot annos obsitum, Coelestis ignarum viæ, Errabat humanum genus.
Cœlestis en Rex curiæ,
Ut monstret ad cœlum viam Secumque ducat exules, Se sponte fecit exulem.
Se deviis præbet ducem, Vires dat ambulantibus: Est ipse quà ducit via, Quo ducit, ipse terminus.
Deus, suprema Veritas, Umbrata velo corporis, Puris videnda mentibus
Lustra tuo nos lumine.
Mundo redemptor qui venis, Fili, tibi laus maxima, Cum Patre, nec tibi minor Laus, utriusque Spiritus.
« PreviousContinue » |