AUDIMUR; almo Spiritus
Descendit è sinu Patris
Ægrisque fert mortalibus
Promissa cœli munera.
Quot proditur miraculis
Præsentis adventus Dei!
Jam tota sublimi domus
Repente flatu personat.
Puro caducus æthere
Candentis ad linguæ modum,
In considentûm verticem
Ignitus imber depluit.
Quæ flamma summas alluit
Innoxio tactu comas,
Hæc gliscit arcanis simul
In pectus et mentem viis.
Stupente turbâ gentium
Linguis loquuntur omnibus:
Vatum crepant oracula:
Quidquid profantur, ignis est.
Inter profandum, Spiritus
In audientes irruit:
Instructa quo passim nova
Surgit Prophetarum seges.
Sit laus Patri, laus Filio,
Par sit tibi laus, Spiritus,
Afflante quo mentes sacris
Lucent et ardent ignibus.
VENI, Creator Spiritus,
Mentes tuorum visita,
Imple supernâ gratiâ
Quæ tu creâsti pectora.
Qui Paracletus diceris,
Donum, Dei altissimi,
Fons vivus, ignis, caritas,
Et Spiritalis unctio.
Tu septiformis munere
Dextræ Dei tu digitus,
Tu rite promissum Patris
Sermone ditans guttura.
Accende lumen sensibus,
Infunde amorem cordibus,
Virtute firmans perpeti.
Hostem repellas longius,
Pacemque dones protinus:
Ductore sic te prævio
Vitemus omne noxium.
Per te sciamus da Patrem,
Noscamus atque Filium,
Te utriusque Spiritum,
Credamus omni tempore.
Sit laus Patri, laus Filio,
Par sit tibi laus, Spiritus,
Afflante quo mentes sacris
Lucent et ardent ignibus.
TER sancte, ter potens Deus!
Incomprehensa Trinitas!
Oh lux perennis! propriis
Oh tu beata gaudiis!
Te densa circum nubila,
Te circum inaccessum jubar,
Quod intus ardent angeli
Circùm trementes cernere.
Te confitetur in tuo
Plebes renata nomine;
Firmaque prælibat fide
Amor quod ambit præmium.
Da posse quod jubes, Pater,
Da scire, Fili, quod doces,
Fac corde toto, Spiritus,
Nos velle quod probas bonum.
Præsta, Pater piissime,
Patrique compar unice, Sancto simul cum Spiritu, Regnans per omne seculum.
Он luce quæ tuâ lates
Beata semper Trinitas,
Te confitemur, credimus,
Pioque corde quærimus.
Oh sancte sanctorum Pater,
Oh nate de Deo Deus!
Oh caritatis vinculum,
Jungens utrumque Spiritus!
Est totus in nato Pater,
In Patre totus Filius,
Natoque plenus ac Patre
Inest utrique Spiritus.
Quod Natus est, hoc Spiritus
Hoc est uterque quod Pater:
Tres una summa veritas,
Tres una summa caritas.
Eterna Patri, gloria,
Natoque sit cum Spiritu,
Qui vivit et regnat Deus,
In sæculorum secula.
Quos in hostes, Saule, tendis,
Quo furore percitus?
Immolare quid tot ardes
Innocentes victimas?
Insequendo quem lacessis,
Senties mox vindicem.
Christus instat, impotentem
Cæcat, urget, dejicit:
Ille cedit imperanti,
Seque totum subjicit,
Insecutor ante Christi,
Præco Christum personat.
Ante plenus qui minarum
Præparabat vincula,
Nunc tremens, nec jam rebellis,
Per manus deducitur:
Qui lupus rapax furebat,
Nunc in agnum vertitur.
Dura, Christe, quam potenti
Corda versas dexterâ!
Qui tuum delere nomen
Vult tuorum sanguine,
Universum mox per orbem
Ipse clarabit suo.
|