Page images
PDF
EPUB

HYMNUS 20.

JUBES, et in præceps aquis
Repente confluentibus,

Prodit sub auras humidis

Exuta velis arida.

Hanc tu colendam qui tuis

Pater, dedisti filiis,

Quos unus orbis continet,
Fac una jungat caritas.

Nunc exulamus; sed tuam
Mox congregabis in domum
Te Patre dignos, qui pio
Amore fratres vixerint.

At qui malignis artibus
Linguisque lædunt proximum,
A te repelles: hoc genus
Coelestis aula non capit.

Adoptionem nos tamen
Efflagitamus integram,
Cui nos sacrato Spiritus
Prædestinavit pignore.

Æterna laus et gloria
Uni sit et trino Deo,
Diffusa per quem cordibus
Fraterna regnat caritas.

HYMNUS 21.

TE principem summo, Deus, Jubes Amore diligi:

Tibi secundum protinus

Jubes amari proximum.

Amore fundatam tuo
Communionem respice;

Quâ corpus unum plurimi
Unum cor, una mens sumus.

Illam fides et veritas

Amabili stipant choro;

Obliquus hinc livor procul
Et litis ardor exulant.

Tu pacis auctor, mutuos
Astringe nexus: da, Pater,
Gaudere fratrum gaudiis
Da condolere fletibus.

Æterna laus et gloria
Uni sit et trino Deo,
Qui moris unius sacrâ
Nos pacis in domo locat.

HYMNUS 22.

Он, quam juvat fratres, Deus,
Unum quibus Christus caput
Vitale robur sufficit,
Uno moveri spiritu !

Quàm dulce laudes dicere
Unâ tibi cunctos domo,
Precumque ceu factâ manu
Inferre vim gratam tibi!

Hanc quisque diligat domum, Hanc pace concors recreet: Væ dira qui spargit mala Dissentionum semina!

Sed damna cedunt in lucrum Te, Christe, diligentibus; Augent coronas prælia,

Prosuntque, dum nocent, mali.

Præsta, beata Trinitas,

Ut caritate mutuâ

Prosimus alter alteri,

Regnemus et polo simul.

HYMNUS 23.

MIRAMUR, Oh Deus, tuæ
Recens opus potentiæ,
Quæ scripta scintillantibus
Refulget astrorum globis.

Ut sol diei, candida
Sic luna nocti præsidet:
Exercitu totum novo
Discriminant stellæ polum.

At ipse, cœlorum decus,
Sol novit occasus suos,
Sunt certa lunæ tempora
Statique lapsus siderum.

Jugi rotata turbine

Furantur et reddunt diem: Tu semper idem, nescius Mortalium spem fallere.

Turbata quid mens fluctuat? Curâ paternâ nos regis: Æterna sit cordi salus;

Eterna nos salus manet.

Suprema laus et gloria
Uni sit et trino Deo,
Suo reponi qui jubet
Curas et angores sinu.

HYMNUS 24.

PROMITTIS, et servas datam
Immobilis fidem, Deus:
Hanc mane primo sedulâ
Reposcimus fidem prece.

Promittit atque decipit
Incertus et fallax homo:

Sic quassa, si incumbas super,
Arundo transfigat manum.

Beatus ergo, qui tuo
Se totus abdit in sinu:
Hâc arce tutum turbinis
Vis nulla de statu quatit.

Ne cor vacillet, obligas
Temet sacramento, Deus:
Spes nixa tanto pignore
Æterna jam prensat bona.

Jam mente præsumens polum
Secura sublimi throno
Assistit, et celestium

Prælibat undas fluminum.

Fons Oh perennis gratiæ
Colenda semper Trinitas,
Te spem salutis unicam
Da mente totâ quærere.

« PreviousContinue »