Ipsa te cogat pietas
Ut mala nostra superes
Parcendo, et voti compotes
Nos tuo vultu saties.
Tu esto nostrum gaudium,
Qui es futurus præmium,
Sit nostra in te gloria,
Per cuncta semper secula.
FELIX dies mortalibus,
Quâ per profusum sanguinem
Homo Deus clausas diu
Intravit æternas domos.
Nos membra, quo nostrum caput
Quo Dux præivit ibimus :
Si jungat una mens simul
Nos una jungat gloria.
Discessit, et suis adest
Præsente semper Spiritu:
Miscens suo se corpori
Omnes in artus influit.
At illa, quæ qualis dies!
Dies tremenda sontibus!
Dum sede descendens suâ
Redibit ultor criminum.
Damnatus insons à reis
Partes resumet Judicis :
Ad cujus ora contrement
Dijudicandi Judices.
Ut morte dignos solveret
Morti volens se subdidit:
Cui mors Dei non proderit,
Vindicta qualis imminet!
Venture Judex seculi,
Jesu, tibi sit gloria,
Cum Patre, cumque Spiritu, In sempiterna secula.
SENSUS quis horror percutit?
Cœlum profundum scinditur:
Christum sedentem nubibus
Hinc inde stipant agmina.
Feralis ad sonum tubæ
Mors jussa reddit mortuos :
Quos ad tribunal Judicis
Urgent coactos angeli.
Ad Judicis sedent latus,
Quicunque spretis omnibus,
Fugere mundum pauperes,
Deum secuti pauperem.
Crux ante Judæis probrum,
Ludibrium Crux Gentibus,
Terror reis, probis amor,
Summo micabit æthere.
Fixere quem diræ trabi,
Cernent, pavebunt, ingement;
Vultu beabit quo suos
Hôc territabit impios.
Fac, Christe, ne mores bonos
Contage mundus inquinet:
Secerne nos ab improbis,
Ne misceamur sontibus.
Venture Judex seculi
Jesu, tibi sit gloria,
Cum Patre, cumque Spiritu, In sempiterna secula.
NOBIS Olympo redditus,
Qui, Christe, sedes præparas,
Nos exules in patriam,
Trahas amoris nexubus.
Bonis abundans omnibus, Ingens eris merces, Deus: Quàm longa pro pœnâ brevi Tuos manebunt gaudia.
Tunc ore nudo qualis es
Quantusque te videbimus:
Amabimus te jugiter,
Te jugiter laudabimus.
Si quos amas non deseris,
Nostræ salutis obsidem,
Mittas ab altis sedibus,
Qui nos adoptet, Spiritum.
Venture Judex seculi,
Jesu, tibi sit gloria,
Cum Patre, cumque Spiritu,
In sempiterna secula.
On Christe, qui noster poli
Præcursor intras regiam,
Quos hic jacentes respicis,
Sursùm voca, sursum rape.
Ad illa fac nos currere
Amore casto gaudia,
Terrena quæ non mens capit,
Quæ sola perspicit fides.
Ubi laborum præmium
Dat ipse se suis Deus:
Et ut beatos expleat,
In omnibus fit omnia.
Qui nos ad istam gratiâ
Ducat potenti gloriam,
Tu de supernis sedibus
Da, Christe, nobis Spiritum.
Qui Patris ad dextram sedes,
Jesu, tibi sit gloria,
Cum Patre cumque Spiritu,
In sempiterna secula.
SUPREME Rector cœlitum,
Qui morte devictâ potens
Cruore signatam tuo
Ad astra pandis semitam!
Alto benignus è Throno
Et Patris almi dexterâ
Quos hic relinquis orphanos,
Non intueri desinas.
Partâ tuis laboribus Jam tu potiris gloriâ:
Nunc hora: promissum Patris Nunc mitte nobis Spiritum..
Qui Patris ad dextram sedes, Jesu, tibi sit gloria,
Cum Patre, cumque Spiritu, In sempiterna secula.
|