CLAMANTIS ecce vox sonans Deserta Judææ quatit:
Mox ad Johannem confluunt
Quos criminum moles gravat.
En ipse permistus reis
Accedit agnus innocens :
Agnus suo qui sanguine
Piabit orbis crimina.
Sub nube carnis at suum
Lucerna Solem detegit :
Lymphis nec audet tingere
A quo lavari debuit.
Parere sed fas est Deo,
Vel quando sese deprimit;
Hunc omne virtutum genus
Implere nempe sic decet.
Agnosce, Præcursor, tibi
Intus revelat quem Deus:
Tu mergis undis corpora,
Hic corda mundat spiritu.
Mundi scelus qui diluis,
Jesu, tibi sit gloria,
Cum Patre, cumque Spiritu,
In sempiterna secula.
EMERGIT undis, et Deo
Fundit preces homo Deus :
Patet polorum regia,
Adest repente spiritus.
Instar columbæ, vertici
Illapsus insidet sacro:
Summi Patris vox personat,
Dilectus hic est filius.
Christi dicata corpore
Sic quem lavacra consecrant,
Hic nascitur proles Dei,
Cœlum precanti panditur.
Castis fit, expers sordibus,
Columba simplex moribus,
Divinus hunc intus regit,
Alit, fovetque Spiritus.
Oh Christe, sacri gurgitis
Quos abluisti fontibus
Tuo cruore candidos
Fac nulla labes inquinet.
Mundi scelus qui diluis,
Jesu, tibi sit gloria,
Cum Patre, cumque Spiritu,
In sempiterna secula.
TE læta, mundi conditor, Unum manet semper quies: Festiva cœlestes choros Semper decent præconia.
Nos sanctitate perditâ,
Poenalis expectat labor,
Hymnos ne dulcis patriæ
Moesti canamus exules?
Qui te piis placabilem
Spondes futurum fletibus,
Lugere da longi, Pater,
Delicta causas exuli.
Verum salubrem temperet
Spe nixa mororem fides :
Tu mox quieti nos tuæ
Lætisque reddes canticis.
Sit summa Patri gloria,
Ejusque soli Filio,
Sancto simul cum Spiritu,
Nunc et per omne seculum.
REBUS creatis nil egens
Temet beatus, nunc tuo
Mundoque das primordia.
Tu cuncta quæ non sunt, vocas,
Et illa se sistunt tibi;
Miroque concentu, suo
Dant conditori gloriam.
At mundus è sinu tuo
Dum prodit aspectabilis,
Augustiorem cogitas
Mundum, Creator, alterum.
Illum Redemptor artifex
Virtutibus condet suis
Sparsoque terris omnibus
Verbi potentis semine.
Illum, peractis seculis
Cœlo locabit, et Throni
Mensæque consortem suæ
Deo redonabit Patri.
Utrique mundo qui præes
Utrumque conserva, Pater:
Utrumque, Fili, dirige,
Utrumque, Flamen, consecra.
Vos ante Christi tempora
Christi fideles asseclæ,
Verenda justorum cohors,
Primique credentûm Patres;
Vestram quis oh dignis queat
Efferre laudibus fidem?
Crebros anhelantis spei
Quis explicet suspiritus?
Hic exules, hic advenæ
Mundi figuram spernitis :
Non literâ, sed spiritu
Promissa pensatis bona.
Intenta mens uni Deo
Respectat æternas domos;
Fac Christe, nos veram quoque
Desiderare patriam.
Sit laus Patri, laus Filio,
Utrumque qui nectis, Deus
Utrique compar, sit tibi
Laus sempiterna, Spiritus.
|