seigneur le duc de Bourgoingne et de Brabant et de reverend pere en Dieu, hault et puissant prince, mons Loys de Bourbon, esleu confermé de Liege, duc de Buillon et conte de Looz :

Et premierement. Pour ce que lesdiz de Huy congnoissent qu'ilz ont grandement meffait, mesprins et offencé contre la haulteur de mondit seigneur le duc, en eulx faisant et constituant ses ennemiz, et en portant mal et dommaige à lui et à ses subgetz, et aussi qu'ilz ont desobey à mondit seigneur de Liege, et qu'ilz ont adheré avec ceulx de la cité de Liege, ilz offrent, ou nom de ladite ville, de amender et reparer lesdiz meffais et offences honnourablement et prouffitablement, ainsi et par la maniere que mondit seigneur le duc et mondit seigneur de Liege adviseront, arbiteront et declaireront, et que dès maintenant ilz agreent et feront agreer, par toute la communaulté de ladite ville, tout ce que par nosdiz seigneurs sera dit, arbitré, ou declairié, touchant ladite amende et reparacion.

Item. Et dès maintenant promectent de obeyr à nostre saint pere le pape, et tenir et faire tenir la sentence d'interdit et autres censures ecclesiastiques par luy ou ses commis pronuncees et declairees à l'encontre de la cité et pays de Liege, au prouffit et à la cause de mondit seigneur de Liege.

Item. Et dès maintenant tiengnent et recongnoissent mondit seigneur de Liege pour leur vray seigneur, et promecteront de le obeyr, comme bons et loyaulx subgetz sont tenuz de faire leur droicturier seigneur; de rendre et restituer tant à lui comme à ses gens et subgetz tout ce que par eulx, et à leur cause, a esté prins et levé de ce que leur appartenoit, et leur reparer les pertes et dommaiges qu'ilz ont souffers à leur moyen;

et, avec ce, pour les offenses et desobeissances faictes contre lui, les lui reparer et amender honnourablement et prouffitablement, au dit et ordonnance de mondit seigneur le duc et de lui, comme dessus.

de

Item. Et, affin que l'on puist garder, maintenir et deffendre lesdiz de la ville et chastellenie de Huy en paix et seurté contre les ennemis et adversaires de mondit seigneur de Liege et de ceulx qui les vouldroient grever et adommaigier, et aussi affin d'entretenir mondit seigneur de Liege en sa seignourie, et pour la seurté et accomplissement des choses promises et accordees par lesdiz deputez et de l'appoinctement qui sera sur ce rendu par lesdiz seigneurs, et pour entretenir gens de guerre èsdites ville et chastel tant et si longuement que besoing et mestier sera, ilz offrent et promectent de faire ouverture desdites ville et chastel de Huy, quant requis en seront, pour y entrer et demourer à telle compaignie gens de guerre que bon semblera à nosdiz seigneurs. Item. Lesdiz de Huy consentent, promectent et accordent que mondit seigneur de Liege et ses successeurs à perpetuité pourront fournir et pourveoir ledit chastel de gens pour icelui garder, d'artillerie, de vivres et de toutes autres choses requises et necessaires à garnison de fortresse, et icelui chastel fortiffier dedens et dehors en toutes manieres, à son bon plaisir, et de oster tout ce qui sera trouvé estre fait et prejudicier à la fortifficacion et sceurté dudit chastel; et promectent de non jamais faire aucuns ediffices, fossez ou autre fortifficacion dommaigables ou nuysables audit chastel et à la seurté d'icelui, sur et à telz peinnes que par mondit seigneur le duc et mondit seigneur de Liege seront advisees.

Item. Promecteut de servir en armes mondit seigneur

de Liege, à toute leur puissance, contre ses ennemiz, adversaires et aultres qui les vouldront grever, et aussi eulx emploier ou fait de la presente guerre, à la fin et à l'intencion de mondit seigneur le duc et de mondit seigneur de Liege.

Item. Que tout ce que dit est ilz feront ratiffier et approuver par lettres seellees du seel de ladite ville, èsquelles les choses dessusdites seront de mot à mot incorporees.

SAVOIR FAISONS que nous, desirans de tout nostre cuer parvenir à ladite grace, et que à ceste fin le contenu en ladite cedule soit accomply, sans y faire faulte quelconque, et ce que avons offert et accordé par vertu de nostredit povoir, lequel avons delivré à noz tres honnourez seigneurs messrs du grant conseil de mondit seigneur le duc, soit accepté, agreé, ratiffié et approuvé par lesdiz habitans, avons promis et promectons, par les foy et serement de noz corps, procurer par effect, devers lesdiz de la communaulté de Huy, lesdites ratifficacion, approbacion et agreement, pour la seurté et accomplissement de tout le contenu en ladite cedule, et de sur ce faire avoir à chascun de nosdiz seigneurs lettres seellees du seel de ladite ville et communaulté, èsquelles icelle cedule sera incorporee de mot à mot, et de icelles envoyer, en dedens dimence viije jour de ce present mois, soleil couchant, ès mains de monseigneur de Gaesbeke, capitaine de la ville de Namur pour mondit seigneur le duc. En tesmoing de verité, nous, Jehan Hustin d'Otremont, maistre de ladite ville de Huy pour le temps, et Ghuys de Berlemont, dit de Floyon, escuier, avons seulement seellees ces presentes de noz seaulx, en l'absence des seaulx des autres dessus nommez; et,

à leur requeste, et pour plus grant approbacion, je, Joannes De Pontfanet, clerc et secretaire de ladite ville de Huy, ay signé de mon seing manuel cesdites presentes. Donnees à Brouxelles le iiije jour de decembre l'an mil ccce. soixante cinq.

JOH. DE PONTFANET, quo ad premissa.

LVI.

Ratification, par la ville de Huy, du traité fait entre ses députés et le duc de Bourgogne: 6 décembre 1465.

(D'après l'original, reposant aux archives du royaume.)

A tous cheaus qui ces presentes lettres vieront et oront, nous, les maistres bourgois, conseil jureis, comuniteit et universiteit generalement de la bonne ville de Huy, salut en Dieu parmanable, avecque cognissance de veriteit. SAVOIR FAISONS que, ajourd'hu, daulte de ces presentes, nous avons esteit convokeis et assembleis ensemble aus Frerez Minneurs en Huy, en nostre lieu acoustummeit, sour ce que par nobles vaillans, saiges et honnoureis nous tres chiers et bin ameis combourgois et boins amis Johan Hustin d'Outremont, eschevin de Wanze, et maistre de Huy pour le

temps; mons Conrar de Boubaix, chevalier, advoeit de Huy et de Liers, singnour de Viersey et d'Andremont ; maistre Ghuys de Berlenmont, dit de Floyon, et Johan Le Clockier, eschevin de Huy, ambdeux escuiers; Gilhe Pollarde, Houbiert de Roheilhees, dit de Montjoye, eschevin de Wanze, jà maistres de Huy, et Remey Douffey, pour le boin mestier des tanneurs, et Lambiert Hannekin, pour le boin mestier des drappiers d'icelle bonne ville, gouverneurs, avoit esteit besongniet et labureit par deleis et avecque tres hauls, tres poisans et tres honoreis singneurs les singneurs de hauls, nobles et discreis consells de tres excellent, tres hault, tres poisant prinche et tres redobté singneur mons1 le duck de Borgoingne, de Braibant, etc., et de tres reverend peire en Dieu, tres excellent, tres hault, tres poisant prinche et nostre tres redobteit et sovrain singneur monsingneur Loys de Borbon, esleu confermé de Liege, duck de Bouillon, conte de Looz, nostre droiturier signeur, pour appaisier la guerre nagaire meue entre ledit tres excellent, tres hault, tres poisant prinche et tres redobté signeur monsingneur le duck avantdit et nous inhabitans et communalteit de la bonne ville et chastellerye de Huy, et pour recovreir sa grasce de che que nous poulrins avoir mespris et offenseit envers luy, et aussi pour nous remectre et reduire en l'obeyssance de nostredit tres reverend peire en Dieu, tres excellent, tres hault, tres poisant prinche et nostre tres redobteit et sovrain singneur monsingneur de Liege avantdit, par vertut de la poissance et commission de part nous la comunalteit et universiteit susdite à nosdis bin ameis combourgois donneie et de nostre gran seel seeleie, et dont de che que labureit avoient et que ils avoient offert, promis et. accordeit pour reppareir les chouses deseurdites,