In hoc totum praevidisti,
Totum simul perfecisti,
Ad exemplar summae mentis
Formam praestans elementis.
Nate, Patri coaequalis,
Patri consubstantialis,
Patris splendor et figura,
Factor factus creatura,
Carnem nostram induisti,
Causam nostram suscepisti:
Sempiternus, temporalis;
Moriturus, immortalis;
Verus homo, verus Deus;
Impermixtus Homo-Deus.
Non conversus hic in carnem ;
Nec minutus propter carnem :
Hic assumptus est in Deum,
Non consumptus propter Deum;
Patri compar Deitate,
Minor carnis veritate:
Deus pater tantum Dei,
Virgo mater, sed est Dei:
In tam nova ligatura
Sic utraque stat natura,
Ut conservet quicquid erat,
Facta quiddam quod non erat.
Noster iste mediator,
Iste noster legislator,
Circumcisus, baptizatus,
Crucifixus, tumulatus,
Obdormivit et descendit,
Resurrexit et ascendit:
Sic ad coelos elevatus
Iudicabit iudicatus.
AD SPIRITUM SANCTUM.
Paraclitus increatus,
Neque factus, neque natus,
Patri consors, Genitoque,
Sic procedit ab utroque
Ne sit minor potestate,
Vel discretus qualitate.
Quanti illi, tantus iste;
Quales illi, talis iste;
Ex quo illi, ex tunc iste;
Quantum illi, tantum iste.
Pater alter, sed gignendo;
Natus alter, sed nascendo;
Flamen ab his procedendo;
Tres sunt unum subsistendo.
Quisque trium plenus Deus,
Non tres tamen Di, sed Deus,
In hoc Deo, Deo vero,
Tres et unum assevero,
Dans usiae unitatem,
Et personis trinitatem.
In personis nulla prior,
Nulla minor, nulla maior;
Unaquaeque semper ipsa,
Sic est constans atque fixa,
Ut nec in se varietur,
Nec in ulla transmutetur.
Haec est fides orthodoxa,
Non hic error sine noxa;
Sicut dico, sic et credo,
Nec in pravam partem ceda
Inde venit, bone Deus,
Ne desperem quamvis reus:
Reus mortis non despero,
Sed in morte vitam quaero.
Quo te placem nil praetendo,
Nisi fidem quam defendo:
Fidem vides, hanc imploro;
Leva fascem quo laboro;
Per hoc sacrum cataplasma
Convalescat aegrum plasma.
Extra portam iam delatum,
Iam foetentem, tumulatum,
Vitta ligat, lapis urget;
Sed si iubes, hic resurget;
Iube, lapis revolvetur,
Iube, vitta dirumpetur:
Exiturus nescit moras,
Postquam clamas: Exi foras.
In hoc salo mea ratis
Infestatur a piratis;
Hinc assultus, inde fluctus,
Hinc et inde mors et luctus;
Sed tu, bone Nauta, veni,
Preme ventos, mare leni;
Fac abscedant hi piratae,
Duc ad portum salva rate.
Infecunda mea ficus,
Cuius ramus ramus siccus,
|