Thare dwelled oure king, the suth to saine,
With his menzè, a litell while;
He gaf gude confort, on that plaine,
To all his men obout a myle.
All if his men war mekill of maine,
Ever thai douted tham of gile;
The Scottes gaudes might nothing gain,
For all thai stumbilde at that stile.
Thus in that stowre thai left thaire live,
That war bifore so proud in
Jhesu, for thi woundes five,
In Ingland help us to have pese!
NOW FOR TO TELL ZOW WILL I TURN
OF [THE] BATAYL OF BANOC Burn. SKOTTES, Out of Berwik and of Abirdene, At the Bannokburn war ze to kene; Thare slogh ze many sakles, als it was sene, And now has king Edward wroken it, i wene: It es wroken i wene, wele wurth the while; War zit with the Skottes, for thai er ful of gile.
Whare er ze, Skottes of Saint-Johnes-toune?
The boste of zowre baner es betin all doune ;
When ze bosting will bede, sir Edward es boune
For to kindel zow care, and crak zowre crowne :
He has crakked zowre croune, wele worth the while;
Schame bityde the Skottes, for thai er full of gile.
Skottes of Striflin* war steren and stout,
Of god ne of gude men had thai no dout;
Now have thai the pelers priked obout,
Bot at the last sir Edward rifild thaire rout:
He has rifild thaire rout, wele wurth the while;
Bot ever er thai under bot gaudes and gile.
Rugh-fute riveling, now kindels thi care,
Bere-bag, with thi boste, thi biging es bare;
Fals wretche and forsworn, whider wiltou fare?
Busk the unto brig, and abide thare:
Thare wretche, saltou won, and wery the while;
Thi dwelling in Dondé es done for thi gile.
The Skotte gase in burghes, and betes the stretes,
All thise Inglis-men harmes he hetes ;
Fast makes he his mone to men that he metes,
Bot fone frendes he findes that his bale betes:
Fune betes his bale, wele wurth the while;
He uses all threting with gaudes and gile.
Bot many men thretes and spekes ful ill,
That sum tyme war better to be stane-still;
The Skot in his wordes has wind for to spill,
For at the last Edward sall have al his will:
He had his will at Berwik, wele wurth the while.
Skottes broght him the kayes, bot get for thaire gile.
HOW EDWARD THE KING COME IN BRABAN
AND TOKE HOMAGE OF ALL THE LAND.
GOD, that schope both se and sand,
Save Edward king of Ingland,
Both body, saul and life,
And grante him joy withowten strif;
For mani men to him er wroth,
In Fraunce and in Flandres both:
For he defendes fast his right,
And tharto Jhesu grante him might,
And so to do, both night and day,
That yt may be to goddes pay.
Oure king was cumen, trewly to tell,
Into Brabant for to dwell;
The kayser Lowis of Bavere,
That in that land than had no pere,
He, and als his sons two,
And other princes many mo,
Bisschoppes and prelates war thare fele,
That had ful mekill werldly wele,
Princes and pople, ald and zong,
Al that spac with Duche tung,
All thai come with grete honowre,
Sir Edward to save and socoure,
And proferd him, with all thayre rede,
For to hald the kinges stede.
The duke of Braband, first of all,
Swore, for thing that might bifall,
That he suld, both day and night,
Help sir Edward in his right,
In toun, in feld, in frith and fen;
This swore the duke and all his men,
And al the lordes that with him lend,
And tharto held thai up thaire hend.
Than king Edward toke his rest,
At Andwerp, whare him liked best;
And thare he made his moné playne,
That no man suld say thareogayne;
His moné, that was gude and lele,
Left in Braband ful mekill dele;
And all that land, untill this day,
Fars the better for that jornay.
When Philip the Valas herd of this,
Tharat he was ful wroth, i wis;
He gert assemble his barounes,
Princes and lordes of many tounes;
At Pariss toke thai thaire counsaile,
Whilke pointes might tham moste availe;
|