Mane nobiscum, Domine, Et nos illustra lumine, Pulsa noctis caligine
Mundum replens dulcedine.
Hoc probat tua passio,
Hoc sanguinis effusio,
Per quam nobis redemptio
Datur Deique visio.
Qui te gustant, esuriunt,
Qui bibunt, adhuc sitiunt,
Desiderare nesciunt
Nisi Iesum, quem diligunt.
Quem tuus amor ebriat,
Novit quid Iesus sapiat;
Quam felix est quem satiat!
Non est ultra quod cupiat.
Iesu, decus angelicum,
In aure dulce canticum,
In ore mel mirificum,
In corde nectar coelicum.
Iesu quaeram in lectulo, Clauso cordis cubiculo, Privatim et in publico
Quaeram amore sedulo.
Quocunque loco fuero,
Mecum Iesum desidero!
Quam laetus, cum invenero,
Quam felix, cum tenuero!
Desidero te millies,
Mi Iesu, quando venies,
Me laetum quando facics
Ut vultu tuo saties?
O Iesu, mi dulcissime,
Spes suspirantis animae,
Te quaerunt piae lacrimae,
Te clamor mentis intimae.
Veni, veni, Rex optime,
Pater immensae gloriae,
Affulge menti clarius
Iam expectatus saepius.
Tu fons misericordiae,
Tu verae lumen patriae,
Pelle nubem tristitiae
Dans nobis lucem gloriae.
Dilecte mi, revertere Consors paternae dexterae, Hostem vicisti prospere, Iam coeli regno fruere.
Te coeli chorus praedicat,
Et tuas laudes replicat,
Iesus orbem laetificat,
Et nos Deo pacificat.
Iesus ad patrem rediit,
Coeleste regnum subiit,
Cor meum a me transiit,
Post Iesum simul abiit.
Iesum sequamur laudibus, Votis, hymnis et precibus, Ut nos donet coelestibus Secum perfrui sedibus.
Coeli cives! occurrite, Portas vestras attollite, Triumphatori dicite: Ave Iesu, rex inclyte!
Hora novissima, tempora pessima sunt, vigilemus. Ecce minaciter imminet arbiter ille supremus. Imminet, imminet ut mala terminet, aequa coronet, Recta remuneret, anxia liberet, aethera donet, 5 Auferat aspera duraque pondera mentis onustae, Sobria muniat, improba puniat, utraque juste.
II. LAUS PATRIAE COELESTIS.
Hic breve vivitur, hic breve plangitur, hic breve fletur;
Non breve vivere, non breve plangere retribuetur; O retributio! stat brevis actio, vita perennis;
O retributio! coelica mansio stat lue plenis ;
5 Quid datur et quibus? aether egentibus et cruce dignis,
Sidera vermibus, optima sontibus, astra malignis.
Sunt modo praelia, postmodo praemia; qualia? plena;
Plena refectio, nullaque passio, nullaque poena.
Spe modo vivitur, et Syon angitur a Babylone;
Nunc tribulatio; tunc recreatio, sceptra, coronae;
Tunc nova gloria pectora sobria clarificabit,
Solvet enigmata, veraque sabbata continuabit.
Liber et hostibus, et dominantibus ibit Hebraeus;
Liber habebitur et celebrabitur hinc iubilaeus.
Patria luminis, inscia turbinis, inscia litis,
Cive replebitur, amplificabitur Israelitis:
Patria splendida, terraque florida, libera spinis,
Danda fidelibus est ibi civibus, hic peregrinis.
Tunc erit omnibus inspicientibus ora tonantis
Summa potentia, plena scientia, pax pia sanctis ;
Pax sine crimine, pax sine turbine, pax sine rixa,
Meta laboribus, atque tumultibus anchora fixa.
Pars mea Rex meus, in proprio Deus ipse decore
Visus amabitur, atque videbitur Auctor in ore.
Tunc Iacob Israel, et Lia tunc Rachel efficietur,
Tunc Syon atria pulcraque patria perficietur.
O bona patria, lumina sobria te speculantur,
Ad tua nomina sobria lumina collacrimantur:
Est tua mentio pectoris unctio, cura doloris,
Concipientibus aethera mentibus ignis amoris.
Tu locus unicus, illeque coelicus es paridisus,
Non ibi lacrima, sed placidissima gaudia, risus.
Est ibi consita laurus, et insita cedrus hysopo;
Sunt radiantia iaspide moenia, clara pyropo:
Hinc tibi sardius, inde topazius, hinc amethystus;
Est tua fabrica concio coelica, gemmaque Christus.
Tu sine littore, tu sine tempore, fons, modo rivus,
Dulce bonis sapis, estque tibi lapis undique vivus.
Est tibi laurea, dos datur aurea, Sponsa decora,
Primaque Principis oscula suscipis, inspicis ora:
|