REGULA ET TESTAMENTUM S. P. N. S. FRANCISCI AD USUM FRATRUM MINORUM STRICTIORIS OBSERVANTIÆ IN GALLIA DEGENTIUM. CADOMI TYPIS PAGNY VIA FRIGIDA. 1872 REGULA ET VITA FRATRUM MINORUM Honorius Episcopus, servus servorum Dei, dilectis. filiis, Fratri Francisco, et aliis Fratribus de Ordine Fratrum Minorum, salutem et Apostolicam benedictionem. Solet annuere Sedes Apostolica piis votis, et honestis petentium desideriis favorem benevolum impertiri. Ea propter, dilecti in Domino filii, vestris piis precibus inclinati, Ordinis vestri Regulam à bonæ memoriæ Innocentio Papâ prædecessore nostro approbatam, annotatam præsentibus, auctoritate vobis Apostolicâ confirmamus, et præsentis scripti patrocinio communimus; Quæ talis est: 787755 IN NOMINE DOMINI INCIPIT REGULA ET VITA Fratrum Minorum. PRIMUM CAPITULUM. Regula et vita Minorum Fratrum hæc est: scilicet, Domini nostri Jesu Christi Sanctum Evangelium observare, vivendo in obedientia, sine proprio, et in castitate. Frater Franciscus promittit obedientiam et reverentiam Domino Papæ Honorio ac successoribus ejus, canonice intrantibus, et Ecclesiæ Romanæ. Et alii Fratres teneantur Fratri Francisco, et ejus successoribus obedire. De his qui volunt vitam istam accipere, et qualiter recipi debeant. SECUNDUM CAPITULUM. Si qui voluerint hanc vitam accipere, et venerint ad Fratres nostros, mittant eos ad suos Ministros Provinciales, quibus solummodo, et non aliis, recipiendi Fratres licentia concedatur. Ministri vero diligenter examinent eos de Fide Catholica et de Ecclesiasticis Sacramentis. Et si hæc omnia credant, et velint ea fideliter confiteri et usque in finem firmiter observare, et uxores non habeant, vel si habent, et jam monasterium intraverint uxores, vel licentiam eis dederint, auctoritate Diocesani Episcopi, voto continentiæ jam emisso, et illius sint ætatis uxores, quod non possit de eis oriri suspicio; dicant illis verbum Sancti Evangelii: quod vadant, et vendant omnia sua, et ea studeant pauperibus erogare. Quod si facere non potuerint, sufficit eis bona voluntas. Et caveant Fratres, et eorum Ministri, ne solliciti sint de rebus suis temporalibus, ut libere faciant de rebus suis quidquid Dominus inspiraverit eis. Si tamen consilium requiratur, licentiam habeant Ministri mittendi eos ad aliquos Deum timentes, quorum consilio bona sua pauperibus erogentur. Postea concedant eis pannos probationis, videlicet duas tunicas sine caputio, et cingulum, et brachas, et caparonem usque ad cingulum, nisi eisdem Ministris aliud secundum Deum aliquandò videatur. Finito verò anno probationis, recipiantur ad obedientiam, promittentes vitam istam semper, et Regulam observare. Et nullo modo licebit eis de ista Religione exire, justà mandatum Domini Papæ, quia secundùm Sanctum Evangelium: Nemo mittens manum ad aratrum, et respiciens retro, aptus est regno Dei. Et illi qui jàm promiserunt obedientiam, habeant unam tunicam cum caputio, et aliam sine caputio, qui voluerint habere. Et qui necessitate coguntur possint portare calceamenta. Et Fratres omnes vestimentis vilibus induantur, et possint ea repetiare de saccis, et aliis petiis, cum benedictione Dei. Quos moneo, et exhortor, ne despiciant, neque judicent homines, quos viderint mollibus vestimentis, et coloratis indutos, uti |